Gozu San Isidro

1

Oh Bantug a San Isidro;

masaplalang ortelano,

Yawad mu keng pakalulu;

King Dios a Ginu tamu.

2

Ulina na ning kalukan da;

Ring mingatba mung matua,

Ala rugu king agyu ra;

Ing a-papagaral daka.

3

Ing minye king beluan mu;

Ing Dios a Espiritu Santo,

Yawad mu keng pakalulu;

King Dios a Ginu tamu.

4

Ing pyalung at pamag-limbang,

Lubus mu ping pengilagan;

Bamung ganap a lingapan,

Ing estadu mung telanan.

5

Ing tula’t, yaman king yatu;

Deyu mung tutu king lub mu,

Yawad mu keng pakalulu;

King Dios a Ginu tamu.

6

Keka e mekayambangan;

Ing bili mu king kalukan,

King bamu mong atuparan;

Ing tungkul mung bininyagan.

7

Uling pekatandanan mu;

Ing turu nang Jesu-Kristo,

Yawad mu keng pakalulu;

King Dios a Ginu tamu.

8

Migigising kang maranun;

Bakang dakal a panaun,

A panupad obligasyun;

King myayaliwa mung tungkul.

9

Inya apa-kirasan mu;

Ing minyaul ka king yatu,

Yawad mu keng pakalulu;

King Dios a Ginu tamu.

10

Pamamunag ning alaya;

Karing pisamban ka munta,

King ba ping ayapa mula;

Di Jesus ilang Maria.

11

Sasaup lang mamararu;

Keka reng anghel ning Ginu,

Yawad mu keng pakalulu;

King Dios a Ginu tamu.

12

Pirarakayan mu ing horas;

King tungkul mung dapat-dapat,

Ketang eka makasumbat;

King kenuman agyang ditak.

13

Uli ning panalala mu;

At king lugud parang tau,

Yawad mu keng pakalulu;

King Dios a Ginu tamu.

14

Balu mung yagpang panaun;

Ing king dapat paman-lingun,

Itang eka maka-kansul;

King aliwang obligasyun.

15

Kinintal mu king pusu mu;

Ing kamua lub agyang kenu,

Yawad mu keng pakalulu;

King Dios a Ginu tamu.

16

Abalu mung pirakayan;

Ing panaun mung lekaran,

King bista’t kalulu ka man;

Sukat da kang alimbawan.

17

Busal na ning kalukan mu;

Ikwa mung milyaring Santo,

Yawad mu keng pakalulu;

King Dios a Ginu tamu.

18

Linub kang obrang kasamak;

King milagyung Juan de Vargas,

Niti ‘gega nakang maplas;

King ika ‘la kang siyasat.

19

Ika e pin sinira mu;

Ing horas, kaba ning bie mu,

Yawad mu keng pakalulu;

King Dios a Ginu tamu.

20

Anti ning simbung da kaya;

Ding kasiping mung magobra,

King ika mag-pabaya ka;

Matas nang aldo datang ka.

21

Uli ning dirya rang tutu;

King pupul mung migit lalto,

Yawad mu keng pakalulu;

King Dios a Ginu tamu.

22

Pablasang lalalu kayap;

Ing pupul king kekang dayat,

King diria rang keka ingat;

Penganyaya raka dapat.

23

Iti maralas ping lalto;

Karing musmus, murang tau,

Yawad mu keng pakalulu;

King Dios a Ginu tamu.

24

Ine nakang pekirakpan;

Ning kasamak mung simbungan,

Karin ya migta-lipampan;

King metung a kalukiban.

25

Ikit na dinatang ka O;

Matas na ping tutung aldo,

Yawad mu keng pakalulu;

King Dios a Ginu tamu.

26

King bubusuk a mua na;

Pintig nang panimanman na,

King dayat mu, ikit na la;

Apat a maputing baka.

27

Salukuyan dong yararu;

Retang adwang baintau,

Yawad mu keng pakalulu;

King Dios a Ginu tamu.

28

Keta akilala na pin;

King deta adua lang angel,

Kasbu mialilan tambing;

King tula nang sapin-sapin.

29

Kilala ning kasamak mu;

Pibandyan kang emu nanu,

Yawad mu keng pakalulu;

King Dios a Ginu tamu.

30

Kanita yabalu nana;

King ing Dios sasaup keka,

Uli nita, sinisi ya;

King kekang pamalmura na.

31

Matula ke, San Isidro;

King kalmang apalaran mu,

Yawad mu keng pakalulu;

King Dios a Ginu tamu.

32

Ding kalulu at danupan,

Uli mula at pakanan;

Dapot kinabsi na la ngan,

Ulam mu e mibawasan.

33

Pati-pati, king lansangan,

Melunus ka at pepakan;

Saku mu e mabawasnan,

Medubli ya king kiskisan.

34

E dinatang ing kauran;

Melangi ing kekang tenam,

Mengadi ka, danum linwal;

Angga ngeni, ‘yang pinuman.

35

Oh bantug a San Isidro;

Masaplalang Ortelano,

Yawad mu keng pakalulu;

King Dios a Ginu tamu.

ANTIFONA

Mineya king dayat at

sinabug na ing binhi ning sasalbag;

Ing binutil a dimpa king masanting a gabun,

memungang dina-dinalan.

V. Tinuru ne ning Guinu ing Banal a tau,

king masanting a dalan.

R. At pepakit na caya ing cayarian

ning Dios.

PANALANGIN

Pagparalampu mipu keka,

O malugud a Guinu ming Dios,

king paulinasa ning pamamintacasi

nang San Isidro labrador,

Emu pu tulutan kekami ing capalaluan;

nune, eti ning mangasanting nang alimbawang

keya king lubus a capacumbaban.

Uli ning cacamal-camalan mung Anak,

Y JesuCristong Guinu ming mabibye,,

at mikipag-Ari Keka.

Manggaman capilan.

YANASA